إجت ساعتك

يمكن إنتَ وماشي على الطريق تدعسك سيارة وتموت.

يمكن إنتَ ومسافر توقع فيك توقع فيك الطيارة وتموت.

يمكن إنتَ وبِعزّ شبابك يصيبك مرض ياخدك أسرع ما كنت بتتوقّع.

يمكن توقع عن شي مطرح عالي وتخبط على راسك وتموت.

يمكن بكلّ بساطة شي ليلة تنام وما توعى تاني نهار.

يمكن، يمكن وألف يمكن...

كتار السيناريوات اللّي ممكن ياخدوك وينهولك حياتك.

مرّات سيناريو سخيف، ومرّات سيناريو ولا أبشع من هيك. ناس بتتعذّب وناس بتروح وما بتعرف إنّها راحت.

للموت أنواع وأشكال غريبة عجيبة، والموت بيبقى سرّ. ما حدا يبعرف أيّ ساعة بيدقّ بابك وبيقلّك: إجت ساعتك! والسؤال اللّي دايمًا بينسأل ودايمًا بيبقى بلا جواب هوّي: ليش؟ ليش هالشخص؟ ليش بهالوقت؟ ليش بهالطريقة؟ ليش، ليش وألف ليش... ودايمًا ما في جواب.

إذا كنّا نحن البشر هلقدّ ضعاف وعارفين كلّنا مصيرنا، وواعيين إنّو حياتنا عالأرض مشوار ما حدا بيعرف أيّ ساعة بيخلص، ليش هلقدّ معلّقين بالحياة؟ ليش مرّات منغرق بمشاريعنا وبأحلامنا ومنصير نخطّط ونحطّ أهداف طويلة المدى؟ يا إنسان، إنتَ يلّي غرقان بهموم الدني ومش فاضي تحكّ راسك، فيك تضمنلي إنّو بعد ساعة رح تكون طيّب؟ ما عم قلّك ما تعيش حياتك وما تحلم. ما عم قلّك ما تخطّط، ما عم قلّك ما تشتغل وتجمّع مصاري... كل اللّي عم جرّب قلّك إيّاه: ما تصير أسير أحلامك ومشاريعك، لأن يمكن في حدا تاني محضّرلك مشروع إنتَ منّك دريان فيه لأنّك بكلّ بساطة مِعمي بمشاريعك... يلّي أعطاك الحياة راسملك مشروع، عم تجرّب شي تكتشفه؟ على أيّ موجة بارم إذاعتك؟ على موجة الأنا أم على موجة الله؟

يا إنسان فتّش عن الأولويّات بحياتك: شو هيّي أولويّاتك؟ مصاري؟ شغل؟ طق حنك؟  وين خيّك الإنسان بأولويّاتك؟ ما تنسى تتركله محلّ بحساباتك لأنّو صدّقني، كلّ شي رح يروح معك وما رح تاخد شي من هالدني معك غير شغلي وحدي: أعمالك. أعمالك هيّي الشي اللّي رح يبقى، والمحبّة اللي زرعتها بقلوب الناس وبالعالم حواليك هيّي وحدها اللّي رح تبقى... يا إنسان بلّش حضّر حالك من هاللحظة وبكلّ دقيقة كون حاضر، ما تأجّل لبعدان، لأنّو ما حدا بيضمنلك إنّو في بعدان. كلّ اللّي عندك إيّاه واللّي أكيد منّه هوّي الحاضر. كرمال هيك حصّن حياتك بأعمال منيحة وازرع المحبّة وين ما رحت، شو ما عملت وبمين ما التقيت، لأنّو لماّ تجي ساعتك وتوقف وجه لوجه أمام الخالق، أمام الحقيقة، ما رح يحاسبك إلاّ على شغلي وحدي: المحبّة. أدّيش بتزرع محبّة بتُحصد.