كلّ ما كبرنا بالعمر وكبرنا بالمعرفة والعلم بتنمى فينا إشيا كتير حلوة ولكن فوق كلّ شي بينمى فينا علّة إذا لحقنا ووقعنا بفخّها... يعطيكن العافية! شو هيّي هالعلّة؟ "التنظير"! مين منّا لماّ يشوف شغلي غلط ما بيبلّش دغري ينظّر ويقول الجملة الشهيرة: "أنا لو كنت مطرح (فلان) كنت عملت وشلت وطلعت ونزلت وغيّرت وإلخ..." إيييه! معلوم! لو هالجملة صحيحة كانت نصّ مصيبة بسّ العلّة إنّو كلّنا بالأخير منطلع عم نفقع نظريّات وحكي بالهوا ما في شي منّو بالواقع! أيّ متى منوعى ومنعرف حجمنا وقدرتنا الحقيقيّة؟ لماّ للأسف ناكل الضرب وندوق اللوعة مباشرةً وناكل الكفّ يلّي كنّا مفكّرين حالنا قادرين نتحمّله وقت اللّي كنّا عم نشوف غيرنا عم ياكله من بعيد لبعيد. كلّنا شاطرين و"فلتات زماننا" منلاقي على طول حلول للناس يلّي بتجي تطلب مساعدتنا ونصيحتنا... منعملّن مواعظ مبكّلة ومنطرق حِكَم "من كعب الدّست"، ويمكن يكون معنا حقّ، ولكن مننسى أحيان كتيرة إنّو هالناس هنّي بشر ولماّ يكونوا غرقانين بمشكلة، حتّى ولو كانوا عارفين الحلّ نظريًّا بيبقى التطبيق أصعب بكتير... ومتل ما بيقولوا: ما حدا بيتعلّم إلاّ من كيسه... عنجدّ غريب كيف مرّات الواحد بيبقى معلَّم كتير ومعو شهادات قدّ ما بدّكن، وإنسان رائع بيلاقي حلول دايمًا لمشاكل الآخرين، لماّ يوقع هوّي بمشكلة معيّنة "بيروح فيها" وبيصير "يبَرعط" وفجأة بيوعى إنّو كلّ هالتنظير يلّي نظّره على غيره منّو عم يقدر يطبّق شي منّو!
كرمال هيك خلّينا نتذكّر دايمًا مين ما كنّا ومهما عِلي شأننا إنّو الحكي والتنظير بمَيل والتطبيق والعيش بمَيل تاني... خلّينا نتعلّم نعيش ووقت نكون عم نعيش بيصير يحقّلنا ننظّر... بأغلب الأحيان، أكتر ناس منتعلّم منّن هنّي أبسط الناس. ليش؟ لأنّو بكلّ بساطة عم يعيشوا بالفعل مش بالحكي. مرّات كتير الولد الزغير أو الفلاح الختيار بيعلّمونا نعيش مليون مرّة أكتر من كبار الأساتذة والمثقّفين... مش عن عبث يسوع قال بيوم من الإيّام: "إن لم تعودوا كالأطفال لن تدخلوا ملكوت السماوات"... فالطفل هوّي يلّي بيعيش عالبساطة وبيعرف حجمه وحاجته وبيتذكّر دايمًا إنّو هوّي بحاجة لحدا أكبر منّو ليعتني فيه... حلو الواحد يوصل بمسيرة حياته - مع كلّ العلم والمعرفة يلّي حصّلن - يعترف بحاجته دايمًا لألله، متل الطفل يلّي بيعرف إنّو وقت يكون بحاجة، إمّه دايمًا حاضرة لإلو...
hayde ya chrik,bi2oula kl cha5ess mano rado b we23o deghre bi7ot 7alo ma7al ghayro w bado yef2a3 nazariye ma 5assa bl 7ayet tayesbot zeto,3eych bl gheir w b7alo ma bya3ref y3ich, w mn heik allah awal chi 3alamna ye 2a3ref 7ele w 3ich ma3 7ele
ReplyDeleteeh ya mirab ma3ak 7a2 200%
ReplyDeletebas daroure tkoun el2echya mechye heik wa 2ela wa2ta 7ada you2a3 bi mechkle bi batel yle2e 7ada 7ado ya3ti nasaye7 w yched fi tlou3, eza el kel keno "we2e3iye" ma3o ra7 ydapress aktar w yle2e sou3oube eno yle2e el 7al!
eltonzir (men as7abna khsouse)2aw2t bi koun motivation... fa bassita! :)
ps: i'm here whenever you need some "tonzir" :)
يا أكبر منظّر إنت والمفضّل عندي :)
ReplyDeleteانشاللّه إقدر ساعدك ما تعوز كيسك كتير لمّا تبلّش حياتك العمليّة وصير نظّر عليك قبل ما توقع بالمشكلة.
نايس بوست
kalemak we2i3e ya bouna 300%(raddan 3a Mlle jess:P) bas c la vie! sha5siyyan, mafi shuf sha5es 3aziz 3layye w 2e7ki w erfa3lo ma3nawiyyeto ma3 eno bkoun 3arfe eno 3am nazzir....bas hayda aktar shi fiye a3emlo tijeho w beddeya2 le2ano mish tali3 bi ide shi gher l tonziiiiiiir
ReplyDeleteleik ibni zibdit el mawdou3 bi ekhir ma2ta3 ya mounazzer inta ya 2awi. B7ebbak ya sabi:)
ReplyDelete