كلمة من القلب للبابا

كلمة من القلب كتبتها بمناسبة تكريم بيّي...

من أوّل ما وعيت عالدّني وأنا بتذكّر إنّو كنت شوف دايمًا قدّامي بيّي بالatelier، ساعة عم يرسم، ساعة عم ينحت... بتذكّر كم مرّة قعدت حدّو هوّي وعم يشتغل، ولمّا يعطيني ورقة بيضاء مع ألوان، أوّل شغلي أعملها كانت إنّو بلّش قلّدو كيف هوّي يعمل أنا كمان أعمل، والجارور عنّا بصالون البيت شاهد على مئات الرسمات يلّي رسمتها وواضح فيها بشكل كبير التأثّر بأعمال بيّي...

ومن أوّل ما وعيت عالدّني كمان بتذكّر إنّو دايمًا كنت محاط بأعمال بيّي، ما شوف إلاّ حيطان ملبودة لوحات وكيف ما أبرم بيطلع تمثال بوجّي يعيّطلي ويحكيني، وياما إيّام معربش عالتماثيل بجنينتنا... يلّي بدّي اوصّلو هوّي إنّو تعلّقت بأعمال بيّي من قبل ما إعرف إحكي ونِميت بيني وبينن علاقة وحبّيتن، وبعدني لليوم إذا بشوف حيط أبيض فاضي ببيت حدا من رفقاتي، بحسّ إنّو في شي ناقص بالنسبة لنظري وبشعر بصقعة غريبة وبغياب حرارة الألوان والأشكال يلّي تعوّد عليها جسمي...

خبرتي مع البابا خبرة نادرة ومميّزة. أكيد كلّ ولد بيبقى بالنسبة لإلو بيّو يلّي بيحبّو وبيهتمّ فيه مثاله الأعلى بالحياة؛ ولكن في شغلي يمكن مش كلّكن بتعرفوها ومش وين ما كان بتلاقو منّا، وبالنسبة لإلي هيّي شي جبّار وخارق وبتعاكس حقيقة الطبيعة:

لحتّى الواحد ينجح إنّو يكون فنّان متفاني بعمله ومنتج لهالدرجة، وينجح بنفس الوقت يكون بيّ عن حقّ وحقيق وما يوفّر ثانية إلاّ ما يكون فيها حاضر كرمال يخلّي البسمة والفرحة وحُبّ الحياة بقلب مرتو وأولاده، هيدي شغلي مش وين ما كان بتلاقوها ونادرين جدًّا الفنّانين يلّي نجحوا بخلق هيك توازن بحياتن.

شخصيًّا، أنا تعلّمت كتير من هالمثال الحيّ قدّامي وبعدني كلّ يوم عم إتعلّم. مظبوظ إنّو بالشكل أنا تقريبًا نسخة طبق الأصل عن بيّي وحتّى بطريقة التصرّف والمشي والحركات copy/paste إذا بدّكن، ولكن كمان بالمضمون، من جوّا، أنا آخد عنّو إشيا كتيرة ومن هالإشيا في صورة رح إحملها معي خلال كلّ مسيرتي الكهنوتيّة إن الله راض بالمستقبل وهيّي: صورة الأبوّة الحقيقيّة والمتفانية لأقصى الحدود، صورة البيّ يلّي حاضر بكلّ لحظة من حياته لأجل أولاده...


بالنهاية، أحدهم قلّي مش من زمان وتحديدًا من أسبوعين، هوّي وعم يُبرم بهالمعرض ويتأمّل الأعمال: "نيّال يلّي بيّو فنّان". أنا اليوم بأكّد عهالنقطة وبقول، مش بسّ نيّال يلّي بيّو فنّان، ولكن: "نيّال يلّي بيّو مارون الحكيم الفنّان"!

يمكن الأولاد قليل ليعبّروا بالحكي عن محبّتن وإمتنانن لأهلن، وعادةً التعبير بيكون بشكل عفوي من دون كلام. ولكن أنا اليوم بهالمناسبة، رح إنتهز الفرصة وقول قدّام الكلّ: بابا أنا بحبّك، بفتخر فيك وبهنّيك على مسيرتك يلّي قدرت فيها إنّو تحمل رسالتين أو قضيّتين وتقوم فِيُن بأجمل طريقة ممكنة: رسالة الفنّ ورسالة الأبوّة.