أنا واعي شو عم أعمل

موضة هالإيّام - ويلّي بتشوفها بشكل واضح عنّا اللبنانيي - هيّي موضة إدّعاء المعرفة والصواب. كلّ إنسان مهما كان عمره مفكّر حلو "أبو ربّا" و"ضابط الكلّ"، وأكتر شي هالموضة دارجي عند الشباب فبتسمعن كلّن بيقولولك: "ما تعتل همّ أنا بعرف شو عم بعمل" أو "أنا واعي كتير منيح شو عم أعمل" أو "صدّقني أنا هيك عم قلّك"... شغلي يمكن بتضحّك أوّل ما بتسمعها ولكن لمّا تشوف أدّيش الناس مغشوشة ومنّا عارفة حدودها وحجمها، عن جَدّ بيطلع عبالي إبكي. على كِتر ما هنّي واعيين ما بتشوفن إلاّ عم يفوتوا بحيطان مسدودة وما بيوعوا للأسف مرّات كتير إلاّ لمّا يكون فات الأوان وصار اللي صار...

عم نظّر؟ طيّب إذا مش مصدّقني رح إنزل عالأرض متل ما كلّ الناس بتحبّ وإعطيك مثَلَين بسيطين وواضحين بيشرحولك كلّ شي...

1-  حديث بين إمّ وإبنها:

-       "يا إبني ما تشرب كتير alcool وتسوق، please توقّى وما تشرب كتير، الله يرضى عليك"

وهوّي بكلّ ثقة وعنجهيّة بيفعط فيها وبيقول:

-       "ولِك يا إمّي خلُصنا بقا! شو مفكّرتيني ولد زغير؟ كلّ مرّة بتكرّيلي المسبحة ذاتها، والله فهمت! أنا واعي على حالي وبعرف أيّ ساعة وقّف شِرِب وما بسمح لحالي أصلاً سوق أنا ومطفي! شو لهالدرجي أنا مهبول؟!"

وبيطبش الباب وراه وبيروح عالسهرة...

إيه طبعًا قوي كتير إنتَ يا زعيم، بسّ يا تسلملي منّك عارف هيأتك إنّو لمّا تنطفي إنتَ بتفكّر حالك بعدك واعي ومسيطر عا حالك، بسّ بالحقيقة إذا انطفيت يعطيك العافية ما بيعود عندك أبدًا توازن وبتصير متل الماشي على ريش! يا تقبرني إمّك معها حقّ لمّا تحذّرك لأنّها عارفة هيّي إنّو لمّا تبلّش تشرب ما رح تعود تعرف أيّ ساعة توقّف ورح تفكّر حالك عنتر قادر تسيطر على عقلك وتوازنك، ورح تطلع بسيّارتك وعا أساس بتكون ماشي عالخطّ الصحيح بتصير فجأة ماشي بعكس السير وبتفوت بالحيط ويعطيك ألف عافية يا شاطر!!! إنتَ بتروح يا "واعي"، يا "قبضاي" ولكن إمّك المعتّرة شو ذنبها؟ والناس يلّي بتقشّن بطريقك شو ذنبهم؟

2-  بتسمع اليوم الشباب والصبايا وخاصّةً الصبايا بيستعملوا كتير كلمة "تسلية" بحديثهم عن العلاقات العاطفيّة وبيحبّوا يعيشوا هالمبدأ وبيقولوا: "شو بيأثّر إذا ضهرنا كلّ فترة مع شبّ أو بنفس الوقت مع عدّة شباب، شو بيصير إذا نوّعنا وغيّرنا على ضرسنا من وقت للتاني، بيحقّلنا نتسلّى! ولووو شو فيها هالدني؟ نحنا واعيين ;تير منيح شو عم نعمل... ما زال الطرفين راضيين شو بيصير طيّب إذا تسلّينا؟؟"

حكي كتير من هالنوع بتسمعوا كلّ يوم عدّة مرّات ومن عدّة أشخاص، وإذا بتقلّن شي بينظرولك بإحتقار وبينعتوك بالمتخلّف والمتزمّت والشخص المملّ اللّي ما بيعرف يعيش...

برافو عليكن، إنتو كتير أذكياء وبتعرفوا شو عم تعملوا يا فهمانين! يا جماعة ما في مَتَل إلاّ ما كان صحيح: يلّي بيلعب بالنار  بيحرق صبيعو! إذا واحد قلّكن إنّكن غلطانين مش لأنّو ما بدّو ياكن "تنبسطوا" و"تعيشوا" ولكن كرمالكن! العواطف مش لعبة أبدًا! إذا بمرحلة معيّنة قدرتوا سيطرتوا عليها وضبطوها رح يجي نهار والعواطف تتسلّط عليكن وتحرقكن من دون ما تقدروا تطفّوها وتاخدكن لمطارح ما بدّكن تروحوا عليها وساعتها رح تعضّوا صبيعكن ندم...

الأمثلة كتيرة وما بتخلص بهالمجال، ولكن بالنهاية، القاسم المشترك بين كلّ هالخبار هوّي واحد: الإنسان لازم يعرف حجمه وحدوده وضعفه كمان! المشكلة كلّ واحد مفكّر إنّو بيقدر يسيطر على حاله، على عواطفه وعلى حواسّه وغيرها... ولكن بالأخير ما في حدا فوق راسه خيمة والعقل مش زينة!