شي مرّة حسّيت إنّك طاير من الفرح وحابب تغمر كلّ العالم؟
شي مرة حسّيت برغبة لتحبّ الناس وتعطيُن من دون مقابل؟
شي مرة حسّيت إنّك حابب تبتسم وترسم بسمة على وجوه الناس كلّها؟
شي مرة كنت مبسوط لدرجة إنّو ما فرقت معك إذا التانيين بَهدَلوك وظلموك وما عَبّروك حتّى؟
شي مرة دقت طعمة السلام الداخلي؟
شي مرة صارت معك إنّو تشوف يلّي الناس بتقرف منّو والبشع حلو؟
شي مرة شعرت برغبة إنّك تشكر كلّ الناس اللي بيستاهل وحتى يلّي ما بيستاهل؟
شي مرة فرِحِت بإنّك انكسرت واعتذرت وطلبت السماح من إنسان؟
شي مرة صغيت لحدا بحاجة يحكي وحسّسته بإنّو هوّي بِنظَرَك أهمّ إنسان بالكون؟
قليلة الأوقات اللي منختبر فيها هالإشيا ومرّات بتمرّ إيام وما منعيشها...
ولكن لكلّ مرة انحطّيت فيها بأحد هالمواقف، أنا بهنّيك وبقلّك نيّالك لأنّك عشت لحظات سماوية، لحظات أبدية.
بكلّ مرة عشت هيك مواقف أنا بأكّدلك إنّك عشت السما عالأرض...
أكيد عم تقول بقلبك: يا ريت فيّي عيش هيك على طول، شو كانت بتكون حلوة هالحياة...مع القديسة تريزيا الطفل يسوع بقلّك: عيش اليوم، عيش الحبّ، ما عندك إلاّ اليوم لتعيش... كون مبسوط وما تأجِّل فرَحك لبُكرا. اليوم وبكلّ يوم إنتَ، بالإشيا الزغيرة، قادر تغيّر حياتك وحياة اللّي حواليك، ما تفوّت هيك فرصة عليك، لأنّو كلّ يوم بيروح ما بيجي متلو، واليوم العالم كلّه بحاجة لإلك: بحاجة لحبّ، بحاجة لسلام، بحاجة لبسمة، بحاجة لحدا يصغي، بحاجة بكلّ بساطة للحياة.
Continue de vivre ces moments de ciel sur la terre. Le monde a tellement besoin d'amour ya ibni. Crie ton amour de vivre partout, c'est très contagieux tu sais?
ReplyDelete