شو بدّك منّي؟

من أكتر الأسئلة التي بتحيّر الناس المؤمنين وخاصّةً فئة الشباب والصبايا منُن: شو بدّو منّي الله؟ شو مشيئته لإلي؟ سؤال بيطرح نفسه وبيشغل راس الكلّ من دون إستثناء لمّا يكونوا بموقف جدّي وبيتطلّب قرار حاسم وجازم. سؤال بيخلّي اللّي عم يسأله يروح بعيد بأفكاره وهواجسه، بيخلّيه يطرح على ذاته أفكار وإفتراضات ما بحياته فكّر فيا، ومرّات كتير هالسؤال بيوضع صاحبه خارج الزمان والمكان وبيخلق عنده حيرة كبيرة وقلق مزعج لدرجة إنّو بيحسّ الحياة وقفت...

هيدي الحالة مش ممكن إذا كنت مؤمن إلاّ ما تمرق فيها وتعيشها لأنّو إيمانك بالربّ ورغبتك بتحقيق مشيئته بيجبروك تطرح السؤال العظيم على نفسك: شو بدّك منّي يا الله؟ شو مشيئتك لإلي؟ ما بيمرق نهار إلاّ ما منصلّي فيه عالقليلة مرّة وحدي صلاة الأبانا ومنلفظ هالكلمتين: "لتكن مشيئتك". عظيم! طيّب شو هيّي مشيئة الله لإلي ولإلَك ولكلّ واحد منّا؟

مشيئة الله هيّي إنّو نكون فرحانين ويكون فرحنا كامل... ومن هونيك ورايح ما بقى تفرق شو بتعمِل وأيّ قرار بتاخد وكيف بتعيش حياتك. بآخر ليلة من حياته عالأرض كشف يسوع لتلاميذه عن كلّ شي وأعطاهن كلّ شي: " قُلتُ لَكم هذهِ الأشياءَ لِيَكونَ بِكُم فَرَحي فيَكونَ فَرحُكم تامّاً" (يو 11/15). إذا يسوع تجسّد وصار إنسان كرمال هدف واحد: خلاص وفرح الإنسان. فإذًا رغبة الله الكبيرة اللّي بيتمنّاها لإلنا كلّنا هيّي إنّو نكون مبسوطين. شو يعني الفرح بحسب قلب الرب؟ هوّي الشعور اللّي بخلّينا نحسّ حتّى لو ما منملك شي بأنّو عنّا كلّ شي. هوّي السلام الداخلي قدّام كلّ العواصف الخارجية اللّي ممكن نواجهها. هوّي إستذواق لطعم السما عالأرض.

إذا كنت بعدك محتار وهاجس تحقيق مشيئة الله عم يطاردك بشجّعك وبقلّك: فكّر منيح شو الشي اللّي بيعطيك الفرح والسعادة واعمِلو، بغضّ النظر إذا هالشي رح يوجّعك بالأوّل. بالنّهاية كلّ قرار بيتطلّب تضحية، وكلّ تضحية بتتطلّب ألم، ولكن الألم مش ممكن إلاّ ما يتحوّل لفرح عالمدى الطويل إذا كان مبني على قناعة... الله خلقنا ليعطينا الفرح.
ما بحياتك تاخد قرار بتعرف إنّو رح يعيّشك بحالة زعل ويأس حتّى لو كلّ الناس شجّعتك عليه، لأنّو إذا اخترت طريق الزعل، بتكون عم تبعَد عن تحقيق مشيئة الله بحياتك...