Skip to main content

إن لم تعودوا كالأطفال

عن علو شي 10000 كم، بسرعة 827 كم/س أنا قاعد بطيّارة MEA المتوجّهة لروما، مادد إجريّي، earphones بدينيّي عم إتسمّع على موسيقى رايقة...
قاعد على الشبّاك، على يميني couple معن ولد إسمو Luca عمره 4 أشهر، عايشين بروما، الرجال إيطالي والمرا نصّ لبنانيّة، نصّ طليانيّة... تفاصيل يمكن ما تهمّكن ولكن خلّتني فكّر بشغلي مهضومة:
من أوّل ما قعدو حدّي بالطيّارة وLuca عم يطّلع فيّي ويضحكلي، ضحكته رائعة! حاسس حالي خاصّةً مع منظر السما والغيوم على يميني، مع شي ملاك طاير بالسما. متل كأنّو بضحكته وبنظراته عم يقلّي:
"ميراب انبُسِط! الحياة حلوة، عيشها ببساطة وما تعتلّ همّ شي، الله بيدبّر. خلّي الإبتسامة دايمًا على وجهك، لأنّو من خلالها بتقدر تعكس صورة الله... الله إله بشوش، بيضحك دايمًا وبدّو منّك تكون على صورته... خلّي روح الطفل دايمًا حيّة فيك. إنتو الكبار، مع هموم الحياة وكلّ تعقيداتها، بتنسوا حقيقتكن وبتصيروا متل "البوم"، دايمًا عابسين، مهَمِهمين، وبتنسوا إنّو بالحقيقة الحياة عالأرض منّا إلاّ مرحلة. كرمال هيك استفيدوا منها للأخير واعكسوا صورة الله على وجوهكن، وخلّي من خلالكن يشعّ نور الفرح والسلام لعالم غِرِق بالحزن والعنف والظلمة..."
أنا بشكرك Luca، يمكن من دون قصدك عملت هالشي، ولكن اعطيتني نفحة رجاء ورسمتلّي بسمة على وجهي خلّتني صدّق إنّو عنجدّ الحياة حلوة... انشالله بسّ إنزل عالأرض ما إنسى فرحة "السما"
26 نيسان 2011 (11.19 توقيت بيروت)

Comments

  1. PetiteApril 30, 2011 at 4:22 PM

    :D i like

    ReplyDelete
  2. Ta mamanApril 30, 2011 at 6:21 PM

    Ya 7abibi inta, quand tu souris, tu es aussi beau que Luca et tu me fais penser exactement de la même manière que Luca t'a fait réfléchir. je t'aime ya zghir inta yalli mich lezim tekbar w teb2a sabi zghir bi alb Jésus!

    ReplyDelete
  3. jessMay 3, 2011 at 11:39 PM

    mirabo is everybody's "luca" :D

    ReplyDelete

Post a Comment

Popular posts from this blog

صورة الله بحياتي

معقول يمرق هالنهار وما عبّرلك عن حبّي وإمتناني الكبير لألله اللّي أعطاني ياكي؟ من أوّل ما وعيت الصبح وأنا عم فكّر بحضورك المميّز بحياتي. شو بدّي قول وكيف بدّي عبِّر عن هالحضور؟ صار عمري ربع قرن وبعترف ما ممكن يقطع نهار وما كون لفظت فيه هالكلمة العزيزة كتير على قلبي: ماما! حضورك يا ماما هوّي أبسط وأحلى تعريف للتضحية والحبّ. لماّ إتطلّع فيكي بفهم كلّ شي ومنّي عايز بقى حدا يعلّمني عن التضحية والحبّ. حضورك لليوم، مدرسة حياة ، علّمني كون إبن لهالحياة وحِبّها مع كلّ نفس بيطلع من تمّي. قليلة شو تحمّلتي تقل دمّي وسمعتي بكي وتفحيش منّي؟ قليلة كم ليلة ما نمتي من ورا "حضرة جنابي"يلّي كنت ضلّني مريض أنا وزغير وحتّى أنا وكبير؟! معقول كيف بعدِك بتعتلي همّي اليوم: أكلت حبيبي؟ أيّ ساعة جايي عالبيت لحضّرلك أكلك؟ أخدت الدوا؟ إلخ... قليلة أدّيش صلّيتيلي مسابح ورافقتيني بدعوتي؟ أنا اليوم أكيد إنّو الفضل الكبير لثباتي بإيماني وبدعوتي هوّي لصلاتك يا إمّي... شو ما قول وشو ما إحكي قليل بحقّك يا ماما، بسّ حابب قلّك إنّو من خلال حبّك وتربيتك ل"أقمارك ال 3" متل ما بتحبّي تسمّينا سماح، نيكو...
Post a Comment
Read more

لَ شو حياتي؟

أمام موت حدا قريب منّي، أمام مرض خبيث بيتكمّش بحدا من رفقاتي الشباب وبيحوّله حياته، أمام حدث مفاجىء بيبطح إنسان كانوا الناس مفكّرينه على شوي "إله"، أمام أيّ شيء ممكن يعملّي خضّة، دايمًا دايمًا برجع بفكّر بنفس السؤال وبكلّ مرّة بحصل على نفس الجواب وبتأكّد منّه أكتر وأكتر: شو هوّي جوهر وأساس هالحياة؟ وشو إلها معنى؟ بسمع الكتاب القدّس عم يقلّي: "تذكّر يا إنسان أنّك من تراب، وإلى التراب ستعود". وبسمع كمان يسوع عم يقول للرجل الغني اللّي مات بلحظة ما كان متوقّعها: "يا جاهل، هذا كلّه الذي أعددته لمَن يكون؟" كلّ مرّة بتأكّد إنّو الحياة اللّي انعطت لإلي هيّي هديّة، هيّي نعمة، هيّي فيض محبّة، الله قدّملي ياها مجّانًا لإستثمرها بكلّ لحظة. مع مرور الإيّام عم أوعى على معنى حياتي وعم إكتشف إنّو بتتلخّص بكلمتين أساسيّتين: المحبّة والقداسة! إذا وحدي من هالكلمتين غابت من حياتي، فلَو مهما عِلِي شأني ولو حصُلت على كلّ الألقاب وحقّقت كلّ النجاحات اللّي بطمح لإلها، رح تبقى حيتي فراغ! البرهان؟ تاريخ البشرية بيحكي لحاله: كلّ إنسان سعي لمجد أرضي وزمني من دون ما يكون في محبّة وق...
1 comment
Read more

بكرا بسّ تكبر

بكرا بسّ تكبر بتبقى تفهم... بعدك زغير... الحياة بتكبّرك وبتعلّمك... عبارات كتيرة تعوّدنا من أوّل ما بلّشنا نفهم ونحلّل ونسأل أسئلة إنّو نسمعها من الأكبر منّا... شو يعني إكبَر؟ مين اللّي بيقول أيمتى صرت كبير أو لاء؟ معقول شي مرة أوصل لمطرح وقول: أنا خلص صرت كبير! على قدّ ما اختبرت لهلّق من الحياة، فيّي قلّكن إنّو صرت أكيد من شغلي وحدي: كلّ ما نكبر بالخبرة وبالحياة نتيجة المصاعب والتحدّيات اللّي منواجهها، ونتيجة الظروف الخارجة عن إرادتنا اللّي بتدخل على صميم حياتنا و"بتشقلب" الميازين "فوقاني تحتاني"، كلّ ما نشعر إنّو بعدنا بحاجة لنكبر أكتر. قدرتنا على النموّ والإستيعاب بتشبه المغيّطة، قدّ ما تطوّرها، قد ما تكبر وتنمى... من هون منفهم ليش يسوع قال: "إن لم تعودوا كالأطفال لن تدخلوا ملكوت السماوات". لأنّو الطفل ببساطة هوّي الإنسان الصغير بحجمه وبفهماته، بسّ كبير بتعلّقه بأهله وبيوثق فيُهن عالعمياني... ونحن كمان قدّ ما نجرّب ونحاول نكبر بطاقتنا الشخصيّة وبإجتهاداتنا، ما رح تنقش معنا إلاّ لمّا نعرف نتعلّق بالربّ ونوثق فيه ثقة الأولاد بأهلهم.
Post a Comment
Read more